ગુજરાતી સાહિત્ય

પ્રિય મને ના છેડ
નયન ઈશારે ઈજન દઈને
પ્રિય, મને તેડ,
પ્રિય મને ના છેડ

કોયલ ગાતી વન વગડામાં
છાની માની ગીત,
પગરવનો સંચાર થતો ત્યાં,
બની જતી લજિજત
પ્રિય, મને ના છેડ…

પ્રેમ કુમુદ તો રમવા કાજે
રવિકિરણ ના ચહાય,
શશિ પર કરતા કોમળ સ્પર્શ
હસી હસી છલકાય
પ્રિય, મને ના છેડ…
નયન. ઇશારે. ઈજન દઈને
પ્રિય મને ના છેડ…

-ભૂપેન્દ્ર વકીલ

સ્વરઃ સૌનક પંડયા
સ્વરાંકન : સુનીલ રેવર

વાયોલીન – ઉ. હપુખાન
ફ્લૂટ – ડી.કે. ચૌહાન
તબલા – દુર્ગાપ્રસાદ મહારાણા

ગિટાર : રમેશ તેલંગ
આલ્બમ – ઉરમાં ગુંજારવ

છૂંદણા છૂંદીને હું તો મૂઈ મૂઈ વા’લમા,
છૂંદણા છૂંદીને હું તો મૂઈ..
થોકબંધ ટહુકાઓ આઘા ઠેલા ને તોય,
પડઘાતી અંતરની કૂઈ..
છૂંદણા છૂંદીને હું તો મૂઈ..

ગામતર આંખુયે વાત્યુંનો વગાડો
ને મહેરામણ મેહણાનો હેમ,
એમાં હું અપલખણી ગાગર લઈ હાલી
ને છલકાતી આંખે સીમ,
પગથીમાં પથરાતા રણકાને નીંદે છે
વડલાઓ સખીઓ ને ફૂઈ..
છૂંદણા છૂંદીને હું તો મૂઈ..

ખાતરમાં લાલ લાલ ચાસ પડે એવા
કે આથમણા ઉગમણા લાગે,
મેળે માહલ્યાની વેળ મેડીએ મૂકી
ને તોયે ભણકારા ભીંતોને ભાંગે,
મહેકી મહેકીને મને અધમૂઈ કરતી
આ મારાતે આંગણાની જૂઈ..
છૂંદણા છૂંદીને હું તો મૂઈ..

-ચિંતન નાયક

સ્વર : હિમાલી નાયક વ્યાસ
સ્વરાંકન : પરેશ નાયક

આખું ચોમાસું તેં મોકલ્યું ટપાલમાં
ને પરબીડિયું ગયું ગેરવલ્લે
હવે મારું ભીંજાવું ચડયું ટલ્લે.

છત્રીને થાય, એક નળિયાને થાય, કોઈ નેવાને થાય એવું થાતું;
ખુલ્લા થયા ને તો યે કોરા રહ્યાનું શૂળ છાતીમાં ઊંડે ભોકાતું;

વાદળાંની વચ્ચોવચ હોવું ને તોય કદિ,છાંટા ન પામવા જવલ્લે-
હવે મારું ભીંજાવું ચડવું ટલ્લે.

ભીંજેલા દિવસોને તડકાની ડાળી પર સૂકવવા મળતા જો હો તતો,
કલરવનો ડાક્યિો દેખાયો હોત – કાશ મારું ય સરનામું ગોતતો;

વાછટના વેપલામાં ઝાઝી નહીં બરકત, ગૂંજે ભરો કે ભરો ગલ્લે
હવે મારું ભીંજાવું ચડ્યું ટલ્લે.

-સંદીપ ભાટિયા.

સ્વરઃ પ્રહર વોરા
સ્વરાંકન : રાસબિહારી દેસાઈ

સૌજન્ય : સંજય રાઠોડ, સુરત

કદાચ કાલે તમારે માથે, પડે જગતને ઉઠાડવાનું, પ્રભુ તો લાંબી રજા ઉપર છે,
ધરાથી લઈને ગગન સુધીનું, તમારે અંધારું ખાળવાનું, પ્રભુ તો લાંબી રજા ઉપર છે.

કળી કળીને ફૂલો બનાવી, સુગંધ એમાં પછી ઉમેરી, અને તમારે ઉપરથી અહીંયાં,
બધાં જ પંખીની ચાંચ માટે, કશુંક ચણવા ઊગાડવાનું, પ્રભુ તો લાંબી રજા ઉપર છે.

સૂરજ સમયસર ઉગાડવાનો, અને સમયસર ડુબાડવાનો, નહીં કરો તો નહીં જ ચાલે,
અને બીજું કે તમારે સાંજે, ગગનને રંગોથી રંગવાનું, પ્રભુ તો લાંબી રજા ઉપર છે.

દરેક બાળકના સ્મિતમાં જઈ, દરેક માતાની આંખમાં રહી, તમારે હાજર થવું જ પડશે,
પછી તમારે બધાંની અંદર,વહાલ થઈને રહી જવાનું, પ્રભુ તો લાંબી રજા ઉપર છે.

પ્રથમ તમારે હવા ને અહીંયાં, બનાવવાની છે શ્વાસ સૌનો,પછીથી શ્રદ્ધા જિવાડવાની,
તમે જ બોલો થશે બધું આ, નહીં તો છોડો પ્રભુ થવાનું, પ્રભુ તો લાંબી રજા ઉપર છે.

-ગૌરંગ ઠાકર

સ્વર : સૌમિલ મુનશી
સ્વરાંકનઃ શ્યામલ સૌમિલ મુનશી

એક મધુર પલ તારી સાથે જ્યાં થાવાની મળશે
ત્યારે મુજને પૂર્ણમીદમનું ગીત ગાવાને મળશે

મન જ્યાં મારું હૃદય નિકુંજ આત્મ થઈને ખીલશે
ત્યારે મુજને અર્પણ કરવા, તુજ ચરણો ત્યાં મળશે

દેહ વિભોર બને ને જ્યારે, ઈડા પિંગલા.. ગાશે
ત્યારે મુજને તુજ સંગાથે રાસે… રચવા મળશે

એક અભેદ ક્ષણ એકાકી, લક્ષ બની જ્યાં જાશે
ત્યારે મુજને હારી સાથે, જીવતર જીવવા મળશે.

-રમેશ પટેલ ‘ પ્રેમોર્મિ’

સ્વર : દિપાલી સોમૈયા
સ્વરાંકન : સોલી કાપડીયા

સૌજન્ય : સંજય રાઠોડ, સુરત