હું તો પરણી મારા પ્રીતમની સંગાથ
Apr 15
ગીત Comments Off on હું તો પરણી મારા પ્રીતમની સંગાથ
હું તો પરણી મારા પ્રીતમની સંગાથ,
વહાલમજી, હું તો પરણી….
બીજાનાં મીંઢળ નહિ રે બાંધું, હું તો પરણી…
ચારે ચારે જુગની વ્હાલે, ચોરીઓ ચિતરાવી રે હાં;
વહાલમજી, હું તો મંગળ વરતી છું બે ને ચાર. બીજાનાં….
રાજસી ભોજન રાણા, જમવાં નથી રે;
વહાલમજી, અમે પ્રેમના ટુકડા માગી ખાશું રે. બીજાનાં….
મોતીની માળા રાણા, કામ ન આવે રે હાં;
વહાલમજી, અમે તુલસીના માળા પહેરી રહીશું રે. બીજાનાં….
હીરતણાં ચીર મારે, કામ ન આવે રે હાં;
વહાલાજી, અમે ભગવાં પહેરીને નિત્ય ફરશું રે. બીજાનાં…
બાઈ મીરાં કે પ્રભુ ગિરિધર નાગર હાં
વહાલમજી હું તો તમને ભજીને થઈ છું ન્યાલ રે બીજાનાં…
-મીરાંબાઈ
સ્વર : તૃપ્તિ છાયા