ગુજરાતી સાહિત્ય

ફરી દૃશ્ય, દૃષ્ટિ દિશાઓ બદલશે,
ફરી નૈન નમણાં નજારા નિરખશે!

ફરી એક જૂની વસાહત મળી છે
ફરી થોડાં ઇચ્છાના કંકાલ જડશે.

ફરી એક અજંપાનો સૂરજ ઉગ્યો છે
ફરી સાંજ ઢળતાં સુધી શ્વાસ તપશે !

ફરી જૂઠની વાટે નીકળી પડાયું
ફરી નવ્ય સત્યોનો રસ્તો ઉઘડશે !

ફરીથી હું પિંજરમાં મોહી પડી છું
ફરી મારી ઉડવાની ઈચ્છા રઝળશે!

-શબનમ

સ્વર : ડો ભરત પટેલ
સ્વરાકંન : ડો ભરત પટેલ

જા રે કોયલડી આંબલીયે જા
મહિયર ની માયા મેલી દે ને મીઠડી
જા તારા પ્રિયતમની સાથે રે જા
મહિયર છોડીને તારે સાસરિયે જા

લીલુડા વનની ઓ રે કોયલડી
પ્રીતના રે ટહુકા વેરજે કોયલડી
માવડીના કાળજાનો કટકો કોયલડી
અંતરના આશિષ ઝીલજે કોયલડી

આંબલિયે મહોરશે મીઠી રે મંજરી
હૈયાના હેતે વાગે ‌પ્રીતની રે ખંજરી
સ્નેહ ની સુવાસ લઈ સાસરિયે સંચરી
ગુણલા‌નો દાયજો દીપાવજે કોયલડી..

-મહેશ સોલંકી “બેનામ”

સ્વર : પ્રગતિ મહેતા વોરા

સ્વરાંકન : અબ્દુલભાઈ ખાવરા

રાધાની વેદના તો દુનિયા એ જાણી પણ માધવની વેદના અજાણી
હૈયા ના ગોખ મહી સાચવી ને રાખી ને હોઠ પર ક્યારેય ના આણી

રાધા એ શબ્દોના બાણ ઘણા માર્યા પણ માધવ ના ખોલે કંઈ વાણી
વાંસળીના સ્વરમાં પણ વહેતી ના મુકે એ, માધવ તો મનના બંધાણી

માધવની નજરો માં છાનું છાનું જોયું ત્યાં ઝાંખી એ મુજને દેખાણી
ઝળું ઝળું સાવ થતી આંખોમાં વાદળ ને વાદળમાં વેદનાના પાણી

રાધા રે રાધા આ મૂંગા તે માધવની વેદના છે તુજ થી અજાણી
તારી તે પીડાના કોચલામાં તુજને એ કદીયે ના થોડી સમજાણી?!

એક વાર માધવના મનને તું વાંચજે ખૂટશેના આંખોના પાણી
“શ્રાવણી” તો શ્રાવણના જળમાં જઈ ડૂબી કે કોણ એને બ્હાર લેશે તાણી?

– પૂજ્ય ઈંદિરાબેટીજી

સ્વર : કલ્પક ગાંધી
સ્વરાંકન : કલ્પક ગાંધી

Courtesy : શ્રી વિપિનભાઈ શાહ USA હાલ વડોદરા

સાધો, હરિ સંગે હરીફાઈ
જીતી જશું તો હરિ જીત્યાની ક૨શું આપબડાઈ. સાધો.

હારી જઈશું તો ઇડરિયો
ગઢ ધરશું હરિચરણે,
કામદૂધા દોહી દોહી
હરિરસ ભરશું બોઘરણે…

ભગતિ તો જૂગટું છે, હાર્યો રમશે રમત સવાઈ સાધો.

અનંતની ચોપાટ પાથરી
હરિએ ફેંક્યા પાસા,
અમે જીત્યા તો ઢોલ વજાડો
હરિ જીતે તો ત્રાંસા.

છેક છેવટ હાર કબૂલી જાશું સ-રસ રિસાઈ. સાધો.

-હરીશ મીનાશ્રુ

સ્વર : અમર ભટ્ટ
સ્વરાંકન : અમર ભટ્ટ

આભલામાં ઘૂમે આખું આભ રે
ગબ્બરમાં ઘૂમે મોરી માત રે
આભલામાં ઘૂમે આખું આભ રે

એક એક ગરબામાં એક એક દીવડો
તાળી તણા તાલ સંગ રમતો લાગે ઘણો
ઘાઘરાના ઘેરમહીં ઘમકે છે ઘૂઘરી ને
ઘૂઘરીમાં ઘૂમે રૂડી ભાત રે

ગબ્બરમાં ઘૂમે મોરી માત રે
આભલામાં ઘૂમે આખું આભ રે

સેંથીએ ઉષાના રંગ છલકે ઉમંગ અંગ
કોકિલમા કંઠ મહીં સરતો મીઠો તરંગ
કંકણના રણકારે રણકે છે રાગિણી ને
રાગણીમાં ઘૂમે આખી રાત રે

ગબ્બરમાં ઘૂમે મોરી માત રે
આભલામાં ઘૂમે આખું આભ રે

-મહેશ સોલંકી

સ્વર : ગાર્ગી વોરા, નિગમ ઉપાધ્યાય
સ્વરાંકન : ડો. ભરત પટેલ