ગુજરાતી સાહિત્ય

 
 
બુઝાતી જ્યોત જેમ હું શમતો અવાજ છું
સાંભળ મને કે હું તને ગમતો અવાજ છું.

આવી શકે તો આવ તળેટી તજી અહીં
હું ટેકરી ના ઢાળ પર રમતો અવાજ છું

ક્યારેક તારી સ્મૃતિ કને થી વહી જઈશ
હું તો પવન ના દેશ માં ભમતો અવાજ છું

પંછી નિહાળી લે પછી જોવા નહિ મળે
હું સાંજ ની ક્ષિતિજ પર નમતો અવાજ છું

 
-પંથી પાલનપુરી
 
સ્વર : હરીશ ઉમરાવ
સ્વરાંકન : હરીશ ઉમરાવ
 
આલ્બમ : વરસુ તો હું ભાદરવો
 
 

 
 
રડી રડી ને વિખરાઈ રાત ફૂલો પર
તુષાર છે કે છે મારી જ જાત ફૂલો પર

તમે કહો છો ભલે બુંદ પણ અમે કહીશું
તરી રહી છે સઘળ કાયનાત ફૂલો પર

પવન ને કાન મરોડી ને કોઈ સમજાવો
ન ખુલ્લે આમ કરે પક્ષપાત ફૂલો પર

ભલા નડ્યા નથી શુ કંટકો કદી એ તને
ફરી ફરી ને તું લાવે છે વાત ફૂલો પર

 
– વિવેક મનહર ટેલર
 

સ્વર : અનિકેત ખાંડેકર
સ્વરાંકન: મેહુલ સુરતી
 
આલ્બમ: અડધી રમત થી
 
 

 
 
સમજદારીથી અળગા થઈ જવાનાં સૌ બહાનાં છે,
મને શંકા પડે છે કે દીવાના શું દીવાના છે?

ખુદા! અસ્તિત્વને સંભાળજે કે લોક દુનિયાના,
કયામતમાં એ તારી રૂબરૂ ભેગા થવાના છે…

ગમે ના સૌ કવન તો માફ કરજો એક બાબત પર,
ખુદા જેવા ખુદાનાં ક્યાં બધાં સર્જન મજાનાં છે?

રાજા દેતો નથી એ પાપીઓને એટલા માટે,
મરીને આ જગતમાંથી એ બીજે ક્યાં જવાના છે?

ચલો એ રીતે તો કચરો થશે ઓછો આ ધરતીનો,
સુણ્યું છે ધનપતિઓ ચંદ્ર પર રહેવા જવાના છે?

તમે પણ દુશ્મનો ચાલો આ મારા સ્નેહીઓ સાથે,
એ કબ્રસ્તાનથી આગળ મને ક્યાં લઈ જવાના છે?

રહે છે આમ તો શયતાનના કબજા મહીં તો પણ,
‘જલન’ ને પૂછશો તો કેહેશે એ બંદા ખુદાના છે…
 
-જલન માતરી
 
સ્વર: દિપ્તી દેસાઇ
સ્વરાંકન :ગૌરાંગ વ્યાસ
 
 

 
 
ચાલો સખી! વૃંદાવન જઈએ,
જિહાં ગોવિંદ ખેલે હોળી;
નટવર વેશ ધર્યો નંદ નંદન,
મળી મહાવન ટોળી… ચાલો સખી !

એક નાચે એક ચંગ વજાડે,
છાંટે કેસર ઘોળી;
એક અબીરગુલાલ ઉડાડે,
એક ગાય ભાંભર ભોળી… ચાલો સખી !

એક એકને કરે છમકલાં,
હસી હસી કર લે તાળી;
માંહી માંહી કરે મરકલાં,
મધ્ય ખેલે વનમાળી… ચાલો સખી !

વસંત ઋતુ વૃંદાવન પ્રસરી,
ફૂલ્યો ફાગણ માસ;
ગોવિંદગોપી રમે રંગભર,
જુએ નરસૈંયો દાસ… ચાલો સખી !’
 
-નરસિંહ મહેતા
 
 
સ્વર : અમર ભટ્ટ
સ્વરાંકન : અતુલ દેસાઈ
 
 

મન ન માને એ જગાઓ પર જવાનું છોડીએ,
કોઈના દરબારમાં હાજર થવાનું છોડીએ.

પ્રેમના પ્રકરણ વિશે કંઈ બોલવાનું છોડીએ,
ચોપડીમાં એક વચ્ચે કોરું પાનું છોડીએ.

હોય જો તાકાત તો બે-ત્રણ હલેસાં મારીએ,
જળને વહેવાની રસમ શિખવાડવાનું છોડીએ.

આમ સ્હેજે આવવાનું એ છે પાસે ખુદ-બખુદ
અહીં કે ત્યાં આજે કે કાલે શોધવાનું છોડીએ.

કંઠમાં શોભે તો શોભે માત્ર પોતાનો અવાજ,
પારકી રૂપાળી કંઠી બાંધવાનું છોડીએ.

કોઈ દુર્ગમ પથ ઉપર તૂટેલી ભેખડ કાં બનો?
છોડીએ તો એક સીમાચિહ્ન નાનું છોડીએ.
 
-હેમેન શાહ
 
સ્વર :પુરુષોત્તમ ઉપાધ્યાય
સ્વરાંકન : પુરુષોત્તમ ઉપાધ્યાય