વીણાવાદિની, મયુરવાહીની

Comments Off on વીણાવાદિની, મયુરવાહીની

 

 

વીણાવાદિની, મયુરવાહીની
તું જ જગમાં તારણહારીણી
ધવલ ધવલ વસ્ત્રધારીણી
વંદુ તુજને શીશ નમાવી

બ્રહ્મ કમંડળમાંથી પ્રગટી
વસંતપંચમી દિન તું જન્મી
થઇ તું ગંગાની જન્મોત્રી
તવ કૃપા આ ઋષી સંસ્કૃતી

હે વીણાવાદિની, મયુરવાહીની
તું જ જગમાં તારણહારીણી

આદ્યદેવી તું જ્ઞાનીઓની
લક્ષ્મીજીની પ્રિય સહેલી
દીપ જ્ઞાનના તું પ્રગટાવે
જગમાંથી અંઘાર મીટાવે

___ વસનારી તું મધુરી
સુવાસ જ્ઞાનની તેં ફેલાવી
જ્ઞાનધાર અવનીમાં વહાવી
ન્યાલ કરે તુજ અમૃતવાણી

સૂર મધુર રેલાવનારી તું
લય આલાપમાં ભરનારી તું
અખિલબ્રહ્માંડે ગીત ગજાવે
જગને તા તા થૈ તું નચાવે

વીણાવાદિની, મયુરવાહીની…

( સરગમ… )
 
– હિના મોદી
 
સ્વર: અમન લેખડીયા, સત્યેન જગીવાલા
સંગીત: મેહુલ સુરતી

 

હરિ હળવે હળવે હંકારે

Comments Off on હરિ હળવે હળવે હંકારે

 

 
હરિ હળવે હળવે હંકારે, મારું ગાડું ભરેલ ભારે
મારું ગાડું ભરેલ ભારે

મેં તો લગામ દીધી હાથ હરિને
હરિ ચાહે તો પાર ઉતારે

હરિ હળવે હળવે હંકારે, મારું ગાડું ભરેલ ભારે
મારું ગાડું ભરેલ ભારે

ભાઈ રે, ભાઈ રે, ભાઈ રે, ભાઈ રે

કાયાની કોઠીમાં બૂરાં કરતૂક ઠાંસ ભરેલા છે
ને કોઈની આંતરડી બાળે એવા
અવગુણ ઉર ઊભરેલાં છે
કંઈ કંકર, કંઈ કુસુમ-કાંટા ને
તને કેટલું પાર ઉતારે

હરિ હળવે હળવે હંકારે, મારું ગાડું ભરેલ ભારે
મારું ગાડું ભરેલ ભારે

ભાઈ રે, ભાઈ રે, ભાઈ રે, ભાઈ રે

દેવની ડેલી દૂર નથી, કઈ કરણી કરેલ કહી દે
ને વધ્યું ઘટ્યું કંઈ પુણ્ય હોય તો
પંડને કાજે દઈ દે
સતનામ જેવી કોઈ મૂડી નથી
કે જે આવે હારે હારે

હરિ હળવે હળવે હંકારે, મારું ગાડું ભરેલ ભારે
મારું ગાડું ભરેલ ભારે

મેં તો લગામ દીધી હાથ હરિને
હરિ ચાહે તો પાર ઉતારે

હરિ હળવે હળવે હંકારે, મારું ગાડું ભરેલ ભારે
મારું ગાડું ભરેલ ભારે

 

-અવિનાશ વ્યાસ

સ્વરઃ મુકેશ
સ્વરાંકન : પુરુષોત્તમ ઉપાધ્યાય અને ગૌરાંગ વ્યાસ

હાથ તારો લાવ મારા હાથ માં

Comments Off on હાથ તારો લાવ મારા હાથ માં

 

હાથ તારો લાવ મારા હાથ માં
ચાલ તું પણ આવ મારા સાથ મા

કયાં સુધી અળગા રહીશું એકલા
આવ પ્રિયે તું જ મારા સાથ મા
ચાલ તું પણ આવ મારા સાથ મા

કોઈ નું ના કોઈ જગ મા તો પછી
સાત પગલાં પણ મારા સાથ મા
ચાલ તું પણ આવ મારા સાથ મા

કેટલા યુગો ને જન્મો થઈ ચહુ
આ તરફ ઓ પાર મારા સાથ મા
ચાલ તું પણ આવ મારા સાથ મા

જોઉં છું તું વન વચાળે એકલી
આવ આ ઉપવન માં મારા સાથ મા
ચાલ તું પણ આવ મારા સાથ મા

ચાલ ચાંદીયે પહાડ, તરિયે સાગરો,
આવ ઉડીયે આભ મારા સાથ મા
ચાલ તું પણ આવ મારા સાથ મા

આ અઢી અક્ષર ભણી લે વેદ ના
પ્રેમ કેરા પાઠ મારા સાથ મા
ચાલ તું પણ આવ મારા સાથ મા
 
-બહેચરભાઈ પટેલ

 
સ્વર: નિધિ ધોળકિયા, નિગમ ઉપાધ્યાય
સ્વરાંકન: ડો. ભારત પટેલ

 

અમથું જરાક અમે પૂછ્યું કે કેમ છો?

Comments Off on અમથું જરાક અમે પૂછ્યું કે કેમ છો?

 

 

અમથું જરાક અમે પૂછ્યું કે કેમ છો?
એમાં શું પડી ગઈ ધાડ,
તમારી નજર જો પડી જાય ઘાસમાં,
તો તરણું પણ બની જાય પ્હાડ.

અમે જૂનો ભરવાડ જેમ ઘેટાં ગણે,
ને એમ દિવસો ગણતા કે હજી કેટલાં?
ને તમે દીધાં સંભારણાના પડદા ઉંચકાય નહીં,
આંખોમાં થાક હજી એટલા.

અરીસાનાં ફૂટવાથી ચહેરો ફૂટે નહીં,
ખોટાં છે કાચનાં કમાડ… તમારી નજર જો..

અમે વૈશાખી તડકામાં બાવળની હેઠ પડ્યા,
પડતર જમીનનાં વેરાણ,
તમે બાવળનાં ફૂલ સમું એવું જોતાં કે,
સૂકી ડાળખીને ફૂટી જાય પાન.

છણકાની છાલકથી જાશે તણાઇ
તમે બાંધેલી ઉંબરાની વાડ.. તમારી નજર જો
 
કવિ: અનિલ જોશી

 

સ્વર : પ્રહર વોરા
સ્વરાંકન: ગૌરાંગ વ્યાસ

 

સુરતાની વાડીના મીઠા મોરલા !

Comments Off on સુરતાની વાડીના મીઠા મોરલા !

 

 
સુરતાની વાડીના મીઠા મોરલા !
ઉછળતા શા ઉરસાગર ઉલ્લાસ જો !
નિર્ઝરતી સૌભાગ્ય સુહાગન જ્યોત્સનિકા:
નયને ઝળકે નમણું નિર્મલ હાસ જો !
સુરતાની વાડીના મીઠા મોરલા !

આંજે ને અંજવાળે આંખલડી સખી :
અન્તર ઉપર ઉઘડે આલમનૂર જો !
હેત હૈયાના વહતી વાજે વાંસળી !
ઉડે સ્વર આકાશે અંતર દૂર જો !
સુરતાની વાડીના મોંઘા મોરલા !

નન્દનવનના પ્રાસાદોની ટોચથી,
મધુરી કેકા આજે શી ઉભરાય જો !
સુરભીઓની સાથે સંસારે સરી,
અન્ત:દ્વારે ગીતા શી અથડાય જો !
સુરતાની વાડીના મોંઘા મોરલા !

તત્ સવિતાનું ભર્ગ વરેણ્યમ ઘીમહિ !
ગાયત્રીનો જૂનો ભેદક મંત્ર જો !
આજે અન્ય પ્રકારે આ માથું નમે,
નમતો સાથે આત્માનો એ તંત્ર જો !
સુરતાની વાડીના મોંઘા મોરલા !
 
-કાન્ત
 

સ્વર : રેખા ત્રિવેદી

 

Older Entries Newer Entries

@Amit Trivedi