ગુજરાતી સાહિત્ય

શોધતો હતો ફૂલ ને ફોરમ શોધતી હતી મને
એકબીજાને શોધતાં ગયાં દૂર તો આવ્યાં કને

કયાંક રે આંબો ટહૂકો એની
વનમાં મ્હેંકી વાત
કમળ જેવો ખીલતો દિવસ
પિયણાં જેવી રાત

શોધતો રહ્યો ચાંદ ને રહી ચાંદની શોધી મને
એકબીજાંને શોધતા ગયા દૂર તો આવ્યા કને

આંખ મીંચુ ત્યાં જૂઈનું ગાલે
અડતું ઝાકળ ફૂલ
મનમાં જાણે લ્હેરાવા લાગે
વ્યોમની કિરણ ઝૂલ

શોધો જેની પગલી એને મારગ શોધે મને
એકબીજાંને શોધતાં ગયાં દૂર તે આવ્યા કને

-ચંદ્રકાન્ત શેઠ

સ્વર :પ્રણવ મહેતા
સ્વરાંકન : ક્ષેમુ દિવેટિયા

અવાજને ખોદી શકાતો નથી
ને ઉંચકી શકાતું નથી મૌન
હે વિપ્લવખોર મિત્રો !
આપણી રઝળતી ખોપરીઓને
આપણે દાટી શકતા નથી
અને આપણી ભૂખરી ચિંતાઓને
આપણે સાંધી શકતા નથી
તો
સફેદ હંસ જેવા આપણા સપનાંઓને
તરતા મૂકવા માટે
કયાં સુધી કાલાવાલા કરીશું
આ ઉપરભૂમિની કાંટાળી વાડને ?
આપણી આંખોની ઝાંખાશનો લાભ લઈ
વૃક્ષેએ ઉડવા માંડયું છે એ ખરું
પણ એ શું સાચું નથી
કે આંખો આપીને આપણને
છેતરવામાં આવ્યા છે ?

વાગીશ્વરના નેત્રસરોવરમાંથી
ખોબોક પાણી પી
ફરી પાણી પી
ફરી કામે વળગતા
થાકી ગયેલા મિત્રો
સાચે જ
અવાજ ને ખોદી શકાતો નથી
ને ઉંચકી શકાતું નથી મૌન

-લાભશંકર ઠાકર

સ્વર :ક્ષેમુ દિવેટીઆ
સ્વરાંકનઃ ક્ષેમુ દિવેટિયા

રાધાનું નામ તમે વાંસળીના સૂર મહીં
વહેતું ના મેલો ઘનશ્યામ
સાંજને સવાર નીત નિંદા કરે છે ઘેલું
ઘેલું રે ગોકુળિયું ગામ……

વણગૂંથ્યા કેશ અને અણઆંજી આંખડી
કે ખાલી બેડાંની કરે વાત
લોકો કરે છે શાને દિવસ ને રાતડી
મારા મેહનની પંચાત
વળી વળી નીરખે છે, કુંજગલી પૂછે છે
કેમ અલી, કયાં ગઈ’તી આમ…

કોણે મુક્યું રે તારે અંબોડે ફૂલ એની
પૂછી પૂછી ને લીએ ગંધ
વહે અંતરની વાત એતો આંખ્યુંની ભૂલ જોકે
હોઠોની પાંખડીઓ બંધ
મારે મોહેથી ચહે સાંભળવા સાહેલીએ
માધવનું મધ મીઠું નામ…

-સુરેશ દલાલ

સ્વર :રાસબિહારી દેસાઈ અને વિભા દેસાઈ
સ્વરાંકન :ક્ષેમુ દિવેટિયા

આભ અને ધરતી બન્ને પર ચાલતી લૂંટાલૂંટ
પતંગને દોરીને માટે જામતી ઝૂટા ઝૂટ
વરસમાં એક દિવસ ઉતરાણ જીવનમાં રોજની ખેંચમતાણ
વરસમાં એક દિવસ ઉતરાણ જીવનમાં રોજની ખેંચમતાણ

સહુને જોઈએ ગમતો પતંગને જોઈએ ગમતી દોરી
હવા એ સૌને ગમે અનુકૂળ થેન્ક્યુ સામે સોરી
સાવ અજાણી અગાસીઓની થઇ જાતી ઓળખાણ
વરસમાં એક દિવસ ઉતરાણ જીવનમાં રોજની ખેંચમતાણ
વરસમાં એક દિવસ ઉતરાણ જીવનમાં કાયમ તાણમતાણ

હુંનો ઉડે પતંગ એમાં ભૂલ શોધે છે લાભ
હુંનો પતંગ જૂની દોરી ઉડવા માટે આભ
સંગ તણો જે ઉમંગ જાણે કરે ના ખેંચમતાણ
વરસમાં એક દિવસ ઉતરાણ જીવનમાં રોજની ખેંચમતાણ
વરસમાં એક દિવસ ઉતરાણ જીવનમાં કાયમ તાણમતાણ

હું કેરું આકાશ હોય ને પ્રેમનો હોય પતંગ
આભ પડે એને નાનું ને ના ખીલે ત્યાં સંબંધ
હું ને ઉડાડે તે જાણે પ્રેમ તણા પરમાણ

સ્વર : આલાપ દેસાઈ