રૂંવે રૂંવે હર ધારે ધારે

No Comments

રુવે રુવે હરધારે ધારે અષાઢ આગ લગાવે અષાઢ આગ લગાવે રે લોલ
શું નિર્મોહી નિર્દય સાજે ગમતાં ગીત બજાવે ગમતા ગીત બજાવે રે લોલ

સાંજ ઉભી છે નૈનો ઢાળી કોઈ પહાડી ઘાટે
ઘુંઘટમાં ઘેરાઇ ગયું, નભ આવ વરસતી વાટે
સહેજે ખીલી જ્યાં રજનીગંધા, શમણા રંગ જમાવે

વણ રે વંચાઈ યાદો જેવા, કંઈક લખાયા કાગળો
પિયા મિલનની વિરહી પળના, વીતી રહ્યા છે વાદળો કામણગારો, વરસી અડકી, શાને પીડ જગાવે?

-દિલીપ જોશી

સ્વર : ગાર્ગી વોરા
સ્વરાંકન : જયંતિભાઈ પટેલ

તારી આરતીના લઈએ ઓવારણાં

No Comments

તારી આરતીના લઈએ ઓવારણાં રે મા….
આંગણમાં રમવા ઊતરો રે
અમે ખોલ્યાં છે હૈયાનાં બારણાં રે મા…..
આંગણમાં રમવા ઊતરો રે

તારી ધોળી ધજાનાં હેત નીતર્યાં રે મા
આંગણમાં રમવા ઊતરો રે
એવાં ચાંચર જઈને ચોક ચીતર્યાં રે મા….
આંગણમાં રમવા ઊતરો રે

દીપમાળાના દીપ મારી આંખડી રે મા …..
આંગણમાં રમવા ઊતરો રે
મારી ચામડી ચીરીને કરું ચાખડી રે મા……
આંગણમાં રમવા ઊતરો રે

તારી તાળીનાં તેજ ચૌદલોકમાં રે મા ….
આંગણમાં રમવા ઊતરો રે
ગરવા ગરબાની ગુંજ ઊઠે ચોકમાં રે મા ….
આંગણમાં રમવા ઊતરો રે

તારા ઊંચેથી ઊંચા પધરામણા રે મા….
આંગણમાં રમવા ઊતરો રે
કેમ ચડીએ અમે તો સાવ વામણા રે મા….
આંગણમાં રમવા ઊતરો રે

છેક પડવેથી આઠમની આરદા રે મા…..
આંગણમાં રમવા ઊતરો રે
મા, તું કાલી, ચામુંડા ‘ને શારદા રે મા ….
આંગણમાં રમવા ઊતરો રે

-સંજુ વાળા

સ્વર : પિયુષ દવે
સ્વરાંકન :ડો ભરત પટેલ

ઓચિંતી આંગણામાં આવી અલબેલડી

No Comments

ઓચિંતી આંગણામાં આવી અલબેલડી
અંબાના સ્વાગત શા શા કરું?

ભીની મારી આંખડી ને ભીની હૃદય પાંખડી
અશ્રુ અભિષેકની ધારા કરું
ઓચિંતી આંગણા માં આવી અલબેલડી
અંબા ના સ્વાગત શા શા કરું?

નયનોના નેહથી નવલી નિરંજના
આરતી ઉતારી માઁના અર્ચન કરું.
ઓચિંતી આંગણા માં આવી અલબેલડી
અંબા ના સ્વાગત શા શા કરું?

આત્મ તણી અંજલિ ને પ્રેમ ની પુષ્પાન્જલી
વ્હાલ થી વધાવી માને વંદન કરું
ઓચિંતી આંગણા માં આવી અલબેલડી
અંબા ના સ્વાગત હું શા શા કરું?

મન અને તન મારું માજી તારા હાથ માં
મનડા વિના હું શું શુ કરું?
ઓચિંતી આંગણા માં આવી અલબેલડી .
અંબા ના સ્વાગત હું શા શા કરું?

-મીહીર ભાઈ સોની

સ્વર : ખુશાલી બક્ષી

માડી તારા નવ નવ ખંડે થાણાં

No Comments

માડી તારાં નવનવ ખંડે થાણાં
કે ખંડ ખંડ અભરે ભર્યા રે લોલ,
માડી તારી જ્યોતે ઝળકયાં વાણાં
કે વાણલાં મંગળ કર્યા રે લોલ–

સૂરજના સાત સાત રંગોથી રંગેલી
ચૂંદડી તે ઓઢી નિરાળી,
ચંદરની ચૌદ ચૌદ ભવનો ઉજાળતી
ટીલડી તેં ચોડી રૂપાળી,
માડી તારાં નીલમ નમણાં નેણાં
કે નેણલે અમી ઝર્યા રે લોલ

ઘૂઘવતા દરિયાના સૂર સમી ગાજતી
ચેતનવંતી તારી તાળી,
આખું બ્રહ્માંડ એવી તાળીઓના તાલે
તે નાચંતું કીધું નેહ ઢાળી,
માડી તારા કંઠે સૂરની હેલી
કે હેલીએ હૈયાં હર્યા રે લોલ

પાંચ પાંચ તત્ત્વોની માંડવડી લઈ તું
આભ અને ધરતીને ઘેરે,
ત્રણ ત્રણ લોકનાં એક એક કણમાં
તું કીરપાનાં કણકણ વેરે,
માડી તારાં કુમકુમ પગલાં જોયાં
ને જોઈને નયણાં ઠર્યાં રે લોલ

-ભાસ્કર વોરા

સ્વર : ગાર્ગી વોરા અને પ્રહર વોરા
સ્વરાંકન : ગૌરાંગ વ્યાસ

તમારી આંખડી કાજલ તણો.mp3

No Comments

તમારી આંખડી કાજલ તણો શણગાર માંગે છે
આ કેવી રોશની છે કે જે સદા અંધકાર માંગે છે

બતાવો પ્રેમપૂર્વક જર્જરિત મારી કબર એને
જ્યારે જાલિમ જમાનો જિંદગીનો સાર માંગે છે

છે સામે રૂપ કિંતુ આંખ ઊંચી થઈ નથી શકતી
વિજયની છે સરસ બાજી ને હૈયું હાર માંગે છે

‘અમર’નું મોત ચાહનારા લઈ લો હૂંફમાં એને
મરી જાશે, એ મરવાને તમારો પ્યાર માંગે છે

-અમર પાલનપુરી

સ્વર :હરીશ ઉમરાવ
સ્વરાંકન : હરીશ ઉમરાવ

થઈ શકે તો બસ ઉથલપાથલ

No Comments

થઈ શકે તો બસ ઉથલપાથલ કરો, વનને વસ્તી, શહેરને જંગલ કરો;
હો શીદને પથ્થર ઉપાડો છો તમે, પાંપણો ઉંચકો અને ઘાયલ કરો.

જ્યાં નિરંતર કોઈનો પગરવ હશે,
ત્યાં પ્રતીક્ષાનો સતત ઉત્સવ હશે.

લાગણીની વ્યગ્રતા છે ટેરવાં, બંધ દ્વારોની વ્યથા છે ટેરવાં.
શક્યતા સબંધની એમાં હશે, એક બારીની જગા છે ટેરવાં.
આંખમાં ભીનાશ જે ઉભરી હતી, એ બધી યે પી ગયાં છે ટેરવાં.
ભેદ જ્યાં જાણ્યો હથેળીનો પછી સાવ મુંગા થઈ ગયાં છે ટેરવાં.

-કૈલાશ પંડિત

સ્વરઃ શેખર સેન
સ્વરાંકનઃ પુરુષોત્તમ ઉપાધ્યાય

સુખની આખી અનુક્રમણિકા

No Comments

સુખની આખી અનુક્રમણિકા અંદર દુ:ખના પ્રકરણ
તમે જિંદગી વાંચી છે? વાંચો તો પડશે સમજણ

પૂંઠાં વચ્ચે પાનાં બાંધ્યાં જેમ ડચૂરા બાઝે
આંસુના ચશ્માં પહેરીને પાને પાનાં વાંચે
પથ્થરના વરસાદ વચાળે કેમ બચાવો દર્પણ
તમે જિંદગી વાંચી છે? વાંચો તો પડશે સમજણ

હશે કોઈ પ્રકરણ એવું કે ખરે વાંચવાલાયક
તમે ફેરવો પાનાંને એ પુસ્તકમાંથી ગાયબ!
ફાટેલાં પાનાંનાં જેવાં ફાટી જાતાં સગપણ
તમે જિંદગી વાંચી છે ? વાંચો તો પડશે સમજણ

આ લેખક પણ કેવો એને દાદ આપવી પડશે
લખે કિતાબો લાખો પણ ના નામ છપાવે કશે
હશે કદાચિત લેખકજીને પીડા નામે વળગણ
તમે જિંદગી વાંચી છે? વાંચો તો પડશે સમજણ

-મુકેશ જોશી

સ્વર : અનંત વ્યાસ
સ્વરાંકન :અનંત વ્યાસ

એક તૂટેલું બીન

No Comments

એક તૂટેલું બીન ને બીજું મન ગમગીન
બોલે તોયે શું? ના બોલે તોયે શું?

કોઈ લોચન ઢળ્યાં જમીન
કોઈ તન ને મન તલ્લીન

બોલે તોયે શું? ના બોલે તોયે શું?

નિર્જન વનવગડાની વાટે
કોઈ વાદળ વરસ્યું ના વરસ્યું,
નીરભર સરવરને આરે
કોઈ ઝૂરે તરસ્યું ના તરસ્યું

એક તડપતું મીન બીજું ઈન્દ્રધનુ રંગીન
બોલે તોયે શું? ના બોલે તોયે શું?

કોઈ રસભર સારસ જોડી
સંગે કરતી દોડાદોડી
કોઈ ક્રૂર પારધી તીરે
વીંધી રુધિરભીની દીધી તોડી

એક બન્યું જ્યાં લીન ત્યાં બીજું બન્યું વિલીન
બોલે તોયે શું? ના બોલે તોયે શું?

-અવિનાશ વ્યાસ

સ્વરઃ હંસા દવે
સ્વરાંકન : પુરુષોત્તમ ઉપાધ્યાય
સંગીત :ગૌરાંગ વ્યાસ

હર એક દ્વાર સ્તબ્ધ છે

No Comments

હરએક દ્વાર સ્તબ્ધ છે, હરએક ઘર છે ચૂપ,
શેરી ને ચોક આટલા કોના વગર છે ચૂપ

થડકે હવામાં છાનું છાનું કોઈ ડૂસકું
અંદર કશોક ભાર છે, ઉપર ઉપર છે ચૂપ.

ચુપકીદીમાં બધી જ ખલલ ઓગળી ગઈ,
ઘટના, અવાજ, સર્વ ક્રિયા, સૌ અસર છે ચૂપ

એવી કઈ બિહામણી ઘટના બની ગઈ?
હરએક શૈ, હરએક સૂ, હરએક નજર છે ચૂપ

પીડા બરફની જેમ થીજી ગઈ છે આસપાસ,
છાતીમાં શ્વાસની ય બધી ચડઊતર છે ચૂપ.

સાંકળ હલે, બળે છે દીવો, ખાલી માર્ગ છે;
ચાલ્યું ગયું છે કોણ કે આખું નગર છે ચૂપ.

સંકેતની લિપિમાં લખ્યો આ કયો વૃતાંત,
કોઈ ઉકેલો, એમાં કઈ કઈ ખબર છે ચૂપ.

  • રમેશ પારેખ

સ્વર :ઉદય મજમુદાર
સ્વરાંકન : ઉદય મજમુદાર

સૌજન્ય : સંજય રાઠોડ સુરત

Contact Us On WhatsApp @Amit Trivedi