ગુજરાતી સાહિત્ય

કાળા ડીબાંગ મારા અંધારા કાપવા રાતો ની રાત હું તો જાગ્યો
મારા હિસ્સા નો જે માગ્યો મેં એ સૂરજ ક્યાં કોઈ એ આપ્યો

વાસંતી વાયરે પંખીડાં ઝૂલ્યા ને મધમીઠા ગીત કઈ ગાયાં
જોતા જોતા માં તો છોડી એ ડાળ જેવા પાનખરી વાયરા વાયા
જાતે ઉલેચ્યો મે દુઃખ તણા દરિયા ને સુખ કેરા મોતી લઈ આવ્યો

ગામ તણા થીજેલા પથ્થરિયા પહાડને હું સ્પર્શ્યો ને ઝરણાઓ ફૂટ્યા
ખળ ખળ ખળ વહેતા એ ઝરણા નાં જળ માહે આશા ના પોયણા ઝૂલ્યાં
ઉજડેલી ધરતી પર વરસી વિશ્વાસ ને લીલોછમ બાગ મે બનાવ્યો
 
-રમેશ ચૌહાણ
 
સ્વર: સૌમિલ મુન્શી
સંગીત: શ્યામલ સૌમિલ મુન્શી
 
આલ્બમ: મારા હિસ્સા નો સૂરજ
 
 

 
 
હે રી મ્હાં દરદે દીવાણી મ્હારાં દરદ ન જાણ્યાં કોય

ઘાયલ રી ગત ઘાઈલ જાણ્યાં, હિવડો અગણ સંજોય
મ્હારાં દરદ ન જાણ્યાં કોય

દરદ કી માર્યાં દર દર ડોલ્યા બૈદ મિલ્યા નહિં કોય
મ્હારાં દરદ ન જાણ્યાં કોય

મીરાં રી પ્રભુ પીર મીટાંગા જબ બૈદ સાઁવરો હોય
મ્હારાં દરદ ન જાણ્યાં કોય
 
-મીરાંબાઈ
 
સ્વર: ગાર્ગી વ્હોરા
સ્વરાંકન : અમર ભટ્ટ
સંગીતઃ અમિત ઠક્કર

વગડાની વચ્ચે તળાવ,
મનનો માનેલો મારો રસિયો ગાગરડી મારી ફોડે છે
ગોરી મને લેવા દો લ્હાવ,
નમણી નાગરવેલ મારી મુખલડું મરોડે છે

બાળ રે પણાથી પ્રિતડી બંધાઈ,
વ્હાલીડાના રંગે હું તો ગઇ રે રંગાઇ
લાગ્યો મને કાળજડે થાક,
સપનામાં આવી મધરાતે નાગેડો મારો છોડે છે

ગોરી મને લેવા દો લ્હાવ,
નમણી નાગરવેલ મારી મુખલડું મરોડે છે
વગડાની વચ્ચે તળાવ,
મનનો માનેલો મારો રસિયો ગાગરડી મારી ફોડે છે

માથે છે ગાગર ને પગમાં ઝાંઝર,
આંખ્યુમાં છલકે રૂપનો સાગર,
આ તો છે ભવભવનો ભાવ, જનમો જનમનો આ ફેરો
પાણીડો મારી જોડે છે
આ તો છે ભવભવનો ભાવ, જનમો જનમનો આ ફેરો
ગોરી તું મારી જોડે છે

 
-બાલમુકુંદ દવે
 
સ્વર: રોહિણી રોય, દિલીપ ધોળકિયા
સંગીત: અજિત મર્ચન્ટ
 
ફિલ્મ: દીવાદાંડી ૧૯૫૦
 
 

 
 
હવે મળશું તો સાંજના સુમારે
આથમતો સૂરજ હો આછો હો ચંદ્રમા
અવનિના એવા ઓવારે!

પગલાંમાં સ્હેજે ઉતાવળ ના હોય અને
અમથો યે ના હો ઉચાટ,
એવો ઉમંગ ચડે દિલને દુવાર
જાણે ઝૂલ્યાં કૈં હિંડોળા-ખાટ;

ચાંદનીના પડછાયા આંખોમાં વિસ્તરતા
ઝાળઝાળ અગનિને ઠારે!… હવે
પોતાની આંખોમાં સુખનો સૂરજ લઇ
પંખીઓ ફરવાનાં પાછાં,
એકાદી ડાળે કોઈ એકાદા માળામાં
ઊતરશે અંધારાં આછાં;

આપણે તો ખીલવાનું મોગરાની જેમ
અને રહેવાનું ક્યારાની ધારે! … હવે
 
-હર્ષદ ત્રિવેદી
 

સ્વર : પ્રાચી શાહ
સ્વરાંકન : અમર ભટ્ટ

જવાબ દે ને ક્યાં છે તું ઓ મારા દિલની આરઝુ
જવાબ દે ને ક્યાં છે તું ઓ મારા દિલની આરઝુ
જવાબ દે ને ક્યાં છે તું

મન તારો સાથ અનુભવે તને આંખો દેખવા ચહે
તને આંખો દેખવા ચહે
એક વાર આવ રૂબરૂ ઓ મારા દિલની આરઝુ
જવાબ દે ને ક્યાં છે તું

તું ચાહે તે તને દઉં અસત્ય નવ જરી કહું
હું તારો એક ગુલામ છું તું મારા દિલની આરઝુ
જવાબ દે ને ક્યાં છે તું

તારા વિના મૃત્યુ ગમે ને તારી સાથે જિન્દગી
ને તારી સાથે જિન્દગી
હૃદયના હિંચકે ઝુલાવું આવ તને પ્રેમથી

ઓ મારા દિલની આરઝુ જવાબ દેને ક્યાં છે તું
ઓ મારા દિલની આરઝુ જવાબ દેને ક્યાં છે તું

 
-રમેશ ગુપ્તા
 
સ્વરઃ તલત મહેમુદ (૧૯૬૧)
સંગીતઃ કેરસી મિસ્ત્રી